دلِ بے خبر ، ذرا حوصلہ
نہیں مُستقِل کوئی مَرحلہ
کوئی ایسا گھر بھی ہے شہر میں
جہاں ہر مکین ہو مطمئن
کوئی ایسا دن بھی کہیں پہ ہے
جسے خوفِ آمدِ شب نہیں؟؟
یہ جو گردبادِ زمان ہے
یہ ازل سے ہے کوئی اب نہیں
دلِ بے خبر ، ذرا حوصلہ
نہیں مُستقِل کوئی مَرحلہ
یہ جو لوگ بیٹھے ہیں جا بجا
کسی اَن بَنے سے دیار میں
یہ سَراب ، یونہی سدا سے ہیں
اِسی ریگزارِ حیات میں
یہ جو رات ہے تیرے چار سُو
نہیں صِرف تیری ہی گھات میں
دلِ بے خبر ، ذرا حوصلہ
نہیں مُستقِل کوئی مَرحلہ
امجد اسلام امجؔد
