ہر زخم کی لَو حاصلِ حُسنِ رگِ جاں ہے
کچھ دِن سے یہی رسم و رَہِ دل زَدگاں ہے
کل تک یہاں زخموں کی نمائش پہ تھی قدغن
اَب محوِ تماشہ ہی صفِ چارہ گراں ہے
گھر کِس نے جلایا ہے‘ کسے کون بتائے؟
منصف ہے یہاں آگ‘ گواہوں میں دُھواں ہے
اِک پَل کو ٹھہر جائے تو کہلائے یہی ’’موت‘‘
یہ خون کی اِک بُوند کہ شہ رگ میں رواں ہے
سُورَج کی سواری سَوا نیزے پہ رُکی ہے
اے قامتِ دلدار‘ تو اِس وقت کہاں ہے؟
جِس شہر کو آباد کیا سنگ دِلوں نے!
اُس شہر کے ہر موڑ پہ شیشوں کی دُکاں ہے
دیکھیں تو ہے سایہ بھی کِسی رُوح کا پَرتو
سوچیں تو یقیں کچھ بھی نہیں‘ صرف گُماں ہے
ہے رنگ بھی نیرنگیٔ اِدراک کا ملبوس
نغمہ جسے کہتے ہو‘ حَسدِ ضبطِ فغاں ہے
اُجڑی ہوئی آنکھوں سے اُدھر خواب کُریدو!
کہتے ہیں خزانہ بھی خرابے میں نہاں ہے!!
اے جُرأتِ اظہار‘ گھڑی بھر کو سنبھلنا‘
اے عرضِ ہُنر‘ بارگہِ کم سُخناں ہے
ٹوٹے تیری اَنگڑائی تو سوچے تِرا فنکار!
خُوشبو کا بھنور ہے‘ یہ دھنک ہے کہ کماں ہے؟
محسن مِری خواہش ہے کہ مقطع میں یہ کہہ دُوں
اے بوڑھی صدی دیکھ‘ مِری سوچ جواں ہے
محسن نقوی
(رختِ شب)
